[УПАТСТВО] РАМ менаџмент во Андроид и зошто НЕ треба да користите Task Killer

[aleksuperior]

Бидејќи има голема дискусија на форумов околу РАМ на мобилните уреди, поготово Андроид и iOS оперативните системи, сакам да споделам како Андроид ја управува искористеноста на РАМ-от и каде најчесто корисниците прават грешки поврзани со истиот - кои се производ на неупатеност и измислени гласини кои што кружат помеѓу луѓето.

Гласините кои што кружат се следниве:
- За да ти функционира добро Андроид телефонот/таблетот мора да се користат Task Killer-и или да се исклучуваат рачно апликациите и процесите преку Settings/Multitask прозорецот
- Ако ти се исклучени апликациите (од РАМ) ќе ти се подобрат перформансите и ќе добиеш подолго користење на батеријата (battery life) од едно полнење

Сега да ви кажам зошто овие гласини не се точни:

Андроид не ги менаџира апликациите и процесите како Windows

Верувам дека сите корисници на Андроид се запознаени со Windows оперативниот систем. Да генерализирам, во Windows ако имате пуштено многу програми/процеси (поготово ако го пополните РАМ-от) ќе ви се намалат перформансите на истиот. Кога ги исклучувате програмите/процесите во Windows, тогаш се подобруваат перформансите.

Андроид е оперативен систем базиран на Linux оперативниот систем и ги менаџира програмите/апликациите/процесите сосема различно. Во Андроид нема едноставен начин да се исклучи апликацијата. Но ова е далеку од проблем, бидејќи со таква цел е дизајниран самиот оперативен систем.

Кога ќе излезете од некоја апликација на Андроид, апликацијата сеуште е во "позадина", но во повеќето случаи таа не го користи ниту процесорот ниту ресурси од мрежата. Случаи во кои апликацијата во позадина ќе ги користи ресурсите на процесорот и мрежата се кога се работи за апликација како следниве: Музичка апликација (додека свири музика), апликација која спушта фајлови, апликации кои се синхронизираат со серверите (како мејл апликации, инстант пораки), и други.
Кога ќе се вратите во апликацијата од која што излеговте, таа инстантно е спремна за користење, бидејќи сеуште била складирана во РАМ-от и спремна за користење.

Многу корисници на Андроид имаат навика цело време да ги исклучуваат апликациите/процесите со Task Killer-и или мануелно, бидејќи се опседнати со тоа колку многу РАМ користи Андроид. Но тоа е позитивната страна на овој оперативен систем, бидејќи апликациите кои се складирани во РАМ-от одма ќе се пуштат - без потреба да се префрлаат од NAND меморијата.

Точно заради овој начин на работење на Андроид, може да заклучиме дека празен РАМ е бескорисен. Напротив, пополнетиот РАМ е добро употребен заради кеширање на апликациите за брза употреба (која е поентата да имате 50GB РАМ а да се користи 1GB). Андроид го полни РАМ-от со корисни апликации кои што ги користите најчесто, за кога ќе ја повикате апликацијата - да се пушти најбрзо. Ако на оперативниот систем му е потребна дополнителна меморија, ќе ја извади од меморија апликацијата која е оддамна користена и со тоа ќе направи простор за новата апликација. Се ова се случува автоматски, менаџирано од кернелот и оперативниот систем - затоа нема потреба да се користат Task Killer-и и рачно стопирање на апликациите од страна на корисникот. Ова е прав МУЛТИТАСКИНГ


Зошто Task Killer-ите и мануелното исклучување на апликациите имаат негативен ефект

Кога се користат Task Killer-и или рачно стопирање на апликациите, не само што правите бескорисни постапки, туку и негативно влијаете на перформансите на самиот уред. Ако која било апликација ја извадите од РАМ-от (или Task Killer-от го направи истото), кога ќе ја вклучите истата пак, апликацијата ќе мора да се вчита од NAND меморијата во РАМ и да се активира процесорот за да се процесира целиот код одново. Оваа постапка ќе ви потроши повеќе батерија отколку да сте ја оставеле апликацијата во РАМ-от. Постојат и апликации кои се напишани да работат цело време во позадина, и ако намерно ги исклучувате, тие одново и одново само ќе се вклучуваат а со тоа ќе ви одземаат перформанси на процесорот и ќе ви ја трошат батеријата.

Верувам дека скоро сите Андроид корисници се запознаени со CyanogenMod. Девелоперите кои што работат таму, не прифаќаат bug reports од корисници кои користат Task Killer-и, бидејќи истите "прават повеќе проблеми отколку што решаваат." Ова кажува многу за тоа колку се корисни Task Killer-ите.

Инаку РАМ-от безразлика дали е празен или пополнет со апликации, троши цело време иста количина електрична енергија - затоа ако имате попразен РАМ нема да добиете подолго користење со едно полнење (подобар battery life).


Совет за подобро корисничко искуство

Покрај тоа што не треба да ги користите Task Killer-ите и да ги исклучувате мануелно апликациите, јас лично познавам многу Андроид корисници кои што заради неупатеност во правилно користење на копчињата за навигација (поточно НАЗАД [BACK]; и ДОМА [HOME] копчињата) несакајќи го успоруваат оперативниот систем - поготово на телефоните со постар (послаб) хардвер и застарена верзија на Андроид каде што помалиот РАМ има поголемо влијание врз успорувањето.

Тоа што го имам констатирано е: кога корисниците сакаат да излезат од некоја апликација, го користат "ДОМА [HOME]" копчето, а многу ретко "НАЗАД [BACK]" копчето.
Проблемот тука е што кога се користи "ДОМА [HOME]" копчето, апликацијата се "ПАУЗИРА" и еквивалентно на Minimize копчето во Windows - спремна за одма да се вратите во апликацијата и да продолжите каде сте застанале. Кога го применувате ова на сите апликации, а немате намера да правите Мултитаскинг (да излезете од една апликација, да влезете во друга, па да се вратите во првата), Андроид ќе го пополни РАМ-от многу брзо со "ПАУЗИРАНИ" апликации кои што зафаќаат повеќе РАМ - па како што отварате нови, оперативниот систем ќе биде приморан да прави FORCE CLOSE на "ПАУЗИРАНИТЕ", со тоа успорувајќи го Андроид.

Правилното користење на копчињата се состои од "НАЗАД [BACK]" копчето за "исклучување" на апликацијата (кеширање на истата во РАМ за брзо користење во блиска иднина) - со тоа и поефикасно користење на РАМ-от и побрз оперативен систем.
Од друга страна, "ДОМА [HOME]" копчето треба да се користи само кога правите моментален Мултитаскинг т.е. паузирате видео, пишување, игра, итн. за да завршите друга работа (на пример сакате да видите нешто запишано во мејловите), но штом ќе ја завршите работата - да се вратите на тоа што го правевте (видео, пишување, игра, итн.)

Со примена на овие едноставни совети, верувам дека ќе ви се подобри корисничкото искуство со вашиот Андроид уред.

Ако имате забелешки и дополнително искуство и знаење на темата, ве молам да ја дополните темава со корисни работи, од кои сите би имале бенефит.

А ако ви се допадна тоа што го споделив и ви помогнав, лајк е доволен!



Извори:
HTG Explains: Why You Shouldn’t Use a Task Killer On Android
http://www.howtogeek.com/127388/htg-explains-why-you-shouldnt-use-a-task-killer-on-android/

How Android Manages Memory
https://developer.android.com/training/articles/memory.html

 

[Dark HaCkeR]

Браво

 

[krema]

Корисно да се знае

 

[psyside]

Важна нормално, многу добро комшија!

 

[igor_igor]

И шо сега треба да го деинсталирам клин мастерот као ?

 

[psyside]

LOL

 

[Dark HaCkeR]

И шо сега треба да го деинсталирам клин мастерот као ?

Да продолжиш да го користиш

 

[aleksuperior]

И шо сега треба да го деинсталирам клин мастерот као ?

Единствена позитивна функција на Clean Master e Cache data remover. Но оваа функција ја има во многу други едноставни апликации само со таа функција која недостигаше на постарите верзии на Андроид. Во поновите верзии е вградена во Андроид, а ти лично можеш да побараш дали ја имаш во Settings>Storage>Cached Data - кликни на последното и ако ти даде опција да го избришеш целиот Cache за сите апликации, тогаш немораш да инсталираш апликации за таа работа.
А како и да е Clean Master-от избриши го зошто не ти придонесува никако и прочитај го уште еднаш првиот пост зошто е тоа така.

 

[igor_igor]

Еве сега пробав го избришав кешот од сетингот ,ама ми треба 6 клика додека стигнам таму ,а со апликацијата со 2.

 

[Dark HaCkeR]

Што мобилка имаш ?

 

[igor_igor]

Alcatel idol 2

 

[Dark HaCkeR]

Вози го така не ти требаат тие програми

 

[aleksuperior]

Еве сега пробав го избришав кешот од сетингот ,ама ми треба 6 клика додека стигнам таму ,а со апликацијата со 2.

Чистењето на кешот треба да го правиш еднаш на 3-6 месеци, така да не ти прави разлика колку клика има за да го направиш.

 

[Dark HaCkeR]

Мене ме интересира за оној кеш во рикавери каква функција има wipe cache што е

 

[alumen :)]

Браво!!

 

[xhktw]

Браво, супер информативно!

Ајде сега сите Apple fanboys да кажат дека Ајфонот автоматски го средува ова, само ние сеуште незнаеме за тоа

 

[omegaRED]

Мене ме интересира за оној кеш во рикавери каква функција има wipe cache што е

Истoтo е.

 

[Dark HaCkeR]

Истoтo е.

Не е баш исто во storage на пример ми стои 40mb го рестатирам и влегувам во рикавери и правам wipe cache одам пак во storage и пак е 40 mb

 

[The_Man]

Браво .


Баш прееска правев муабет со многу близок другар за ова . Очигледно е квантна физика за да се свати ова чим на многу добар другар(кој патем користи lowend андроид и ајпад 3) не можев да му објаснам.
Ние се смееме на форумов ама на просечниот корисник можеби му е стварно тешко да свати, поготово во македонија каде луѓето мислат дека се работи како виндоус.

Затоа ова предлагам да се стави како важна тема,а може и на порталот една вест.

Јас би додал уште нешто за оние со помала меморија :

Секогаш оставајте минимум 400-500мб слободна внатрешна меморија. Телефонот треба да има простор за кеширање .И програми како ccleaner и clear master користете за бришење на кеш ,а не како taskkiller.

 

[tomi]

Браво ! Одлично објаснето

 

[Sephiroth]

Заборави да напоменеш дека тоа што го пиша за Windows важи само за XP. Од Vista па навака, Windows го користи рамот слично на Линукс. Во моментов имам кеширано 5 гига во меморија, најчесто користени апликации, системски фајлови, па и кориснички фајлови можда.

 

[DarkEnchanter]

Браво, корисен текст.


Многу луѓе користат тасккилери, и сум ги убедувал дека не треба ама они пак убедени дека ке им се подобрат перформансите ...

Сите другари/другарки што имаат андроид телефон, сум ги приметил дека користат таскилер, безразлика која калса на телефон е..

Инаку да се надоврзам на темата ама за иОС и мултитаскингот.
Исто т.е слично работи и иОС-от, апликациите не треба да се гасат од позадина, тоа како што рече троши повеќе ресурси-батерија, да се изгаси па да се пушти пак апликацијата.

Само што ова на иОС се прави многу по умешно па и да имаш 512 рам, нема сецкања и чуда..

Јас до пред 7-8 месеца редовно чистев апликации од позадина,и тоа инстанто одма чим ке завршам со позадината, па после дознав за ова дека е неправилно и дека троши повеќе батерија, ама не е нешто многу разлика ама сепак е така

 

[Gajche-X]

Секоја чест за објаснувањето
Се надевам на многу корисници ќе им се разјаснат работите сега.

 

[PandaBomber]

Околу „правилно“ користење HOME копче не се согласувам, во првиот дел од текстот се наведува предноста апликациите да бидат во „позадина“, зашто тогаш од нив да излегуваме со BACK?

 

[The_Man]

Јас ќе додадам уште нешто

Процесите се делат на :

Foreground - Ова е она што моментално го гледате на екранот, исто и phone и system. Ова е последно нешто што е биде автоматски исклучено.

Visible process - Ова е процес кој е видлив за корисникот,но нешто друго е во foreground(најчесто диалог ко оној на вибер пример).

Service process - овде се наоѓаат сервисите кои се активни во позадина. На пример слушате музика додека сурфате,епа сервис за да ја слушате музиката иде у позадина. Исто и сервиси како локација,воип сервисот на вибер, фејсбук сервис за пораки итн. Значи не ви оди вибер во позадина, тоа е сервис,ако го ислучите немој да се чудите зошто не ви стигнала порака.

Background process- Овде иде апликацијата кога ќе стиснете HOME.Aктивна е во позадина но не е видлива за корисникот. Ова има големи шанси да биде исклучено при недостаток на рам.

Empty process - Ова се кешираните процеси,не се активни,не трошат батерија,ни процесорски ресурси,но сепак најголема галама се крева околу нив . Ова прво ќе биде тргнато при недостаток на меморија.


Се надевам дека сега нема веќе да прочитам пост за тоа како оделе апп.у позадина непотребно.