10 Совети за префрлање во ИТ од друга професија и да се задржи мотивацијата!

Многу луѓе решаваат да го променат професионалниот правец и да влезат во светот на ИТ – некои се успешни, некои помалку, но сите имаат совети за почетниците. Од тие приказни и од лично искуство, создадов листа на клучни работи што ќе ви помогнат да ја смените професијата успешно и без многу стрес.

1. Не мислете дека сте премногу стари!
   ИТ нема правила за возраста! Дури и ако сте на 30 или 35, тоа не е пречка. Луѓето често се откриваат што сакаат да прават дури на оваа возраст, така што секако не сте стари и никогаш не е доцна!
2. Направете план!
   Секој учи различно, па создадете си чекор-по-чекор план за најмалку 6 до 12 месеци обука. Вклучете читање, курсеви, практични задачи и интервјуа, така ќе се избегне несакани и непланирани работи пред вистински да започнете.
3. Создадете финансиска сигурност
   Промената може да значи и понизок приход на почетокот. Започнете со штедење или планирање буџет за да ја избегнете финансиската непријатност додека се снаоѓате во новото поле.
4. Научете цела професија, а не само една вештина
   ИТ бара пошироко знаење, не само познавање на еден јазик или алатка. Размислете за целата слика, какви реални проблеми ќе решавате со новите вештини.
5. Сфатете го учењето сериозно
   Во ИТ, знаењето и вештините се сѐ, особено на почетокот. Практикувајте и повторувајте многу, знаењето може да ви затреба години подоцна на интервју или работата од соништата.
6. Барајте работа рано!
   Почнете со аплицирање и интервјуа уште пред целосно да ја завршите обуката. Така ќе стекнете искуство, а може и да го искористите знаењето на наставниците да прашате ако не ви е нешто јасно!
7. Не се откажувајте по првите одбивања
   Одбивањата се дел од процесот, и ќе се случат. Одржете ја мотивацијата, секоја грешка е учење и чекор поблиску до целта.
8. Побарајте поддршка од блиските
   За поголемиот успех во промена на кариерата, потребна е поддршка. Ова значи и споделување на достигнувањата со најблиските и заедничко разбирање на вашата нова цел.
9. Поставувајте нови цели
   Во ИТ светот, новите вештини секогаш се бараат. Со поставување нови цели, секогаш ќе напредувате и ќе бидете релевантни на пазарот.
10. Споделете ја својата приказна
    Споделувањето на вашето искуство може да ве поврзе со истомисленици, да ви помогне да изградите професионални контакти и да стекнете корисни совети и препораки од заедницата.

Нека овие 10 совети ви бидат при рака кога ќе одлучите да започнете со изучување на нов професија и кога ќе бидете подготвени за успешен старт во ИТ!

Која е вашата успешна приказна?
Кои се советите што вие ги добивавте додека учевте, а кои ќе бидат советите кои вие ќе ги дадете на дргите?

 

[NanoCell]

Одлична тема и првични совети.
Иако лично го немам направено префрлањето, во голем број ситуации сум имал прилики да работам со луѓе кои го направиле тој чекор. Би додал уште еден совет, кој во суштина е близок до неколку од гореспоменатите, но мислам дека заслужува да биде спомнат:

Не се споредувајте со колегите!
Сфатете дека секој има сопствена патека, одредено предзнаење и работно искуство. Фокусирајте се на достигнување на тоа знаење во побрз (но реален) период и останате позитивни. Тоа што некој е далеку помлад од вас, но понапред во моментот во кариерата, треба да ви биде мотивација (гледајќи дека секторот и самата фирма има простор за напредок), а не да чувстувате притисок. Не се угледувајте на односот кон работата кои го имаат сениор колегите, нивниот некогаш ноншалантен пристап кон одредена проблематика и кон работното време, е поради тоа што вложиле безброј часови над стандардното време кога биле почетници како вас и тоа искуство им дава простор. Исто така, задржете го оптимизмот, бидејќи некогаш вашето различно искуство може да донесе свежа перспектива и гледиште на одредени проблеми.

Не се фокусирајте само на финансискиот дел при барање на работа
Секако финансиите се важни и неизбежен дел од општеството во кое живееме, но стартната плата не би требало да е единствен фактор. Доста битен фактор е можноста да научите и да го проширите вашето знаење на почетокот од вашата авантура во ИТ светот. Нивото на знаење во иднина ќе ви биде пресуден фактор во иднина при преговори за нова позиција, зголемувања или нови работни места во друга компанија и ќе игра огромна улога во позицијата во која ќе бидете (дали вие ќе барате работа или ќе ве бараат вас). Знаењето е моќ и ќе ви овозможи освен подобри финансии, да изберете попријатни работни услови и атмосфера.

Бидете проактивни, но и реални во однос на обврските кои можете да ги завршите
Бидете реални во однос на тоа што знаете и кои ви се јаки и слаби страни. Никој не очекува да знаете се, ниту да бидете перфектни, затоа бидете искрени кога барате/добивате нови обврски и објаснете со кои делови би ви требала помош. Недостигот на искуство и знаење, надоместете го со желба за учење и ентузијазам за нови предизвици кои ќе го донесат тоа знаење. Секогаш ќе имате поддршка од колегите и менаџерите со одредени проблеми во повеќето нормални фирми.

 

[G4M3R]

Како некој кој има сменето кариера и „прескокнато“ во ИТ, неколу сугестии и од мене:

Учење, „tutorial hell“, и проекти
Како и за секоја промена во кариера, особено за ИТ ќе треба да научите како да учите. Мора да најдете кој ви е најефективен начин на учење и која комбинација ви носи најдобри резултати, дали книги, видео туторијали, блогови, интерактивно решавање на проблеми итн.

Многу почетници често се заглавуваат со материјал, константно менуваат извори за учење, и остануваат во т.н. „tutorial hell“... Каде што знае да одвлече многу време и напротив да ве дистанцира од новата работа.

Уште еден туторијал да поминам и ќе почнам да правам проект < јас сум го поминал, колеги, и многу други луѓе биле тука. Се додека не пренасочите дел од знаењето во некаков проект кој може да го дискутирате на интервју, вечното гледање туторијали нема да ви помогне за новата работа.
Многу е по вреден еден проект отколку да кажете на интервју дека сте изгледале 13 туторијали за React, а притоа немате ништо изработено да го потврдите вашето знаење. Доколу имате било какви изработени проекти, веќе сте во предност и од старт имате за што да дискутирате на интервјуа.

Уште еден туторијал да поминам и ќе почнам да барам работа < истото, мора да пресечете, да спремите CV и да почнете со барање на работа. Јасно ни е, не се чуствувате спремни, немате толку самодоверба, ве тепа импостер синдром, но останувајќи само на учењето нема да направите прогрес за наоѓање нова работа. Ви се учи или барате нова работа?


Интервјуа и работа
Ментално спремете се дека ќе бидете одбиени на интервјуа, некогаш со, некогаш без образложение. Во некои ситуации ќе поминете и четири интервјуа и на крај нема да ја добиете работата. ИТ е доста заситен свет кој бара на (ваш)одреден начин да се одвоите од толпата, многу упорност и дел среќа. Егзактни правила нема, некогаш може на прва да ја добиете работата па наредната да ве здробат од интервјуа и да примат некој друг.
Целта е да се „продадете“ најдобро што можете, како и да ви звучи ова. HR, CTO, или кој и да ве интервјуира не е баба ванѓа и ако не сте вокални при процесот, апсолутно нема да имаат појма за вашите знаења и вештини.
Луѓе ја добивале работата дури и со помало знаење од конкурентите, бидејќи подобро се продале и ги убедиле зошто тие се правиот кандидат.

Во зависност од кој стадиум сте во процесот за барање работа, доколку немате успех треба да најдете каде имате слабости. Уште еднаш да напоменам дека нема правила, но нејсе неколку примери од мое искуство бидејќи сум бил од двете страни.

1. Воопшто не добивате интервјуа - Лошо CV/Linkedin, пренатрупано или шупло, напишани непотребни работи, лош темплејт, итн. Не доволно „докази“ дека се поклопува вашето знаење со позицијата. Тука е на вас дали ви фали уште надоградување или исправки во CV.
2. Поминувате HR, но не добивате второ - зависно од позицијата, обично второ може да е техничко интервју. Ако не прогресирате понатаму, најверојатно имате слабост со знаењето кое го бараат.
3. Паѓате на последните интервјуа - ретко, но се случува. Од мое искуство биле culture/team fit тип на интервјуа кои бараат вештина во комуникација, и ако не се поклопите добро обично одат со наредниот кандидат. Едноставно знае да се сведе и до преференца, и може воопшто ништо лошо да не сте направиле а сепак да одат со друг кандидат.

Може и да се отвори тема на истава тематика, па на кој почетник му треба помош да праша таму да му дадеме совет.

 

[Isak Keyten]

Ако ви вредат неколку совети од човек што држи интервјуа:
(пс. повеќето се генерални, не само за новајлии)
(ппс. точките не се подредени по битност, туку како ми доаѓаат на ум)
(пппс. сите сличности се случајни )

- Фалете се само за работи што навистина ги знаете
Не е импресионирачки да кажете “имам работено со микрофронтенди“ кога на прашањето “како ви беа поставени микрофронтендите“ вашиот одговор е “не знам, тоа сениорот го направи/беше више направено/станко го среди“. Напротив тоа се минус поени зашто е провидно фалењето и не покажува скромност.

- Ок е нешто да не знаете, прашајте за повеќе
Никој не е роден учен, и никој не знае се. Кога ќе ве прашаат прашање на кое не го знаете одговорот, кажете “не знам, не сум се сретнал/а со тој проблем до сега“. Ова е сосема легитимен одговор. Бонус поени ако го споите со “како вие би го решиле?“ или “...ќе си запишам да истражам после интервјуто“. У најлош случај нема да ја добиете позицијата пошто навистина се бара човек кој е веќе искусен во тие проблематики ама ќе научите многу, а со малку среќа вашиот ентузијазам ќе резултира со тоа да ве вработат без разлика што не знаете нешто. Е сеа ако не знаете ништо, тоа е више друг проблем, но повторно не сте зијан да го гледате интервјуто како искуство од кое може да научите.

- Ценете го времето на интервјуерот
Ова е малце општо а и надоврзување на претходното. Ве прашале нешто, не знаете што е одговорот. Како што кажав погоре, сосема ок. Тоа што НЕ Е ок е да а) застанете во мислителна поза и да седиме во тишина 30 секунди кои изгледаат како вечност и за вас и за мене б) сите заедно чекаме да ви текне нешто што не сте го ни знаеле в) навистина размислувате ама не размислувате на глас. Мислам дека е јасно зашто сакаме да се избегне оваа ситуација

- Слушајте внимателно
Ова не е ни поврзано само во ИТ индустријата ама и те како е битно, особено тука. Додека интервјуерот ви поставува прашање, слушајте го. Почекајте да заврши. Па потоа почнете да одговарате. Никој нема да ви го рачуна како позитивно тоа ако го прекинете интервјуерот од ентузијазам дека „го знаете“ одговорот уште пред да довршам. Основна учтивост оди далеку. Башка што ќе испаднете смешни ако погрешно сте сфатиле нешто пошто сте избрзале да одговорите. Ако не ви е нешто јасно, почекајте да заврши соговорникот, и препрашајте. “Ако добро ве разбрав, проблемот е ова ова и ова ова и треба ова да се направи?“.

- Одговарајте концизно
Како надоврзување на претходното. Ако ве прашаат “Како се прави <X>“, одговорот треба да содржи “Вака се прави <X>“. А не да почнеме од атомите како градливи клетки на космосот и да имате монолог 15 минути. Знам, неретко проблемите се покомплицирани од “Вака се прави...“ ама ако интервјуерот мисли дека сака во повеќе детали да провери дали навистина го знаете тоа што го одговарате, ќе ви надоврзе прашање кое ќе бара повеќе детали. Во најмала рака, ако одговорот е навистина комплициран и е смешно да се одговори на кратко, проширете го одговорот со претпоставки. т.е. “Ако претпоставиме дека X = Y, N = M, и Z = P, тогаш проблемот се решава вака. Во спротивно зависи од <нешто трето>". Тука оставате на интервјуерот да постави дополнително прашање ако го занима подетално.

- Спремете се за интервју
Знам дека е очигледно и смешно ама не сте свесни колку луѓе дошле на интервју не спремни. Едно е да не знаете нешто, тоа е ок, друго е да имате 5 години искуство и да не знаете основни работи. И на крајот од интервјуто ако/кога ќе ве прашаат “дали имате некои прашања за нас“, би било пожелно да имате некое прашање. Не ретко ми се случувало да на крај прашам “дали има нешто за што си се спремал за ова интервју но не успеавме да те прашаме“ да ми биде кажано “ау, шо знам, ја уствари не се спремав ич хаха“. Не бидете овој кандидат. Потрошете пола саат и изгуглајте “top 50 interview questions for <X>" и ценете го времето на работодавецот.

Ако ми текне уште нешто ќе допишам ама ова се главните работи кои најчесто ги гледам помеѓу кандидати што аплицираат